مبدأ منع الخطأ (بوكا يوكا)

فيه مبدأ في الهندسة يبدو كوميدي ومضحك ولكنه مُستخدَم في كافة المنتجات تقريباً والمبدأ ده يخص أكثر مجال تصميم المنتجات (product design) وهندسة الأنظمة (system engineering) ..... إسمه منع الخطأ أو منع الغباء اه زي ما قريته كدا 😂 سياسة منع الغباء 😅 وده منهج ياباني شهير في الهندسة تحت مسمى البوكا يوكا Poka Yoke اللي اخترع المنهج اللطيف ده مهندس ياباني يدعي شيجيو شنجو shigeo shingo ✨

لما تشتغل في مجال تصميم المنتجات سواء في التصميم أو التنفيذ هيكون أكتر سؤال على بالك أثناء التصميم هو إزاي أتفادى الاستخدام السئ أو الاستخدام الخطأ للمُنتَج 🤔 وده دور مصمم النظام / المنتَج طبعاً 🤨 وجزء من الأخطاء اللي مفترض تصمم النظام / المنتج نفسه إنه يمنعها من الأساس وهي أخطاء العمالة في التركيب أو التنفيذ 👌 وهنا تظهر أهمية مبدأ منع الغباء البوكا يوك ✨

وعلشان نفسّر المبدأ ده بشكل واضح، هو ببساطة إن المصمم يجبر المستخدِم على الاستخدام بالطريقة الصحيحة عشان يتفادى المشاكل والكوارث 👍 وأشهر مثال هو شريحة التليفون ؛ الحافة المشطوفة (chamfer) اللي موجودة في أعلى الشريحة؛ و دي بتحمي المستخدم من وضع الشريحة بشكل غلط و بيجبره إنه يحطها بشكل صح 👌

مبدأ البوكا يوكا ومنع الخطأ مُنتشِر في كل المنتجات اللي حوالينا وأشهرها الأجهزة الكهربائية وازاي يجبر المستخدم على خطوات معينة حفاظاً على الجهاز من الكهرباء أو للحفاظ على المستخدم نفسه.

ومن الأمثلة الشهيرة للبوكا يوكا هي مكنة الـ ATM اللي بنستخدمها بشكل يومي، تخيل يا عزيزي لو كانت خطوات سحب الفلوس إن الفلوس والإيصال بيطلع الأول وآخر حاجة تتطلع هي الفيزا 🤔 كان 90% من المستخدمين نسيوا الفيزا واستعجلوا ومشيوا 😅 وده بيحصل في الإيصال ؛ الناس بتنسى الإيصال لأنه بيطلع آخر حاجه ، لكن الإيصال أقلهم أهمية 😉

المهندس اللي صمم السيستم لولا إنه استخدم سياسة البوكا يوكا (منع الغباء / الخطأ) لكان الوضع صعب ✋

منتجات / أنظمة لا حصر لها زي الرسايل التذكيرية اللي بتجيلك وانت بتمسح حاجة من ع الكمبيوتر أو أبليكيشن أو زي أصوات الإنذار .. إلخ.

إن كنت تفضل مشاهدة الفيديو أكثر من قراءة المقالات، اشترك في القناة على اليوتيوب من هنا. إن كنت تستخدم برنامج تليجرام ، يُمكنك الاشتراك في قناة تيليجرام للحصول على الموضوعات الجديدة. لمزيد من المعلومات عن البرمجة ولينكس وأندرويد وويندوز وماك وآيفون وتصميم المواقع، ابحث عن "موقع أبانوب حنا" على جوجل وادخل للموقع وستجد موضوع جديد يشرح فكرة أو معلومة جميلة ومفيدة كل يوم.