يعاني الكثير من المصممين من مشكلة سرقة العملاء لأعمالهم على الإنترنت. لا تشتغل مصمم شعارات على الإنترنت ، وتتواصل مع عملاء من كل دول العالم ، وتشتغل في العمل الحر ( فريلانسر ) ، لازم تعرض شغلك على الزبون من غير ما تديله فرصة إنه ياخد شغلك من غير ما يحاسب عليه .. يسرق شغلك يعني .. طبعاً في طرق كتير عشان تأمن نفسك. لكن مش كل الطرق مناسبة الأيام دي. خلينا نبحث عن حل للمشكلة دي.
الحل الأول : ملف PDF مؤمن برقم سري
إنك تبعت اللوجو / الشعار في ملف PDF وتأمنه بباسورد فكره مش وحشة ، لكن في مشكلة !! وهي إن في مواقع كتير أونلاين بتكسر حماية الملف وتمسح الباسورد وتديلك ملف PDF عادي بدون حماية. إذن طريقة الملف المحمي برقم سري مش هتنفع للوجو ❎
الحل التاني : صورة عليها علامة مائية
إنك تبعت اللوجو أو الشعار أو التصميم بتاعك وتحط عليه علامة مائية (watermark) عشان تحميه ، فكرة كانت حلوة. لكن بعد انتشار المواقع اللي بتشيل العلامات المائية بإستخدام الذكاء الإصطناعي الفكرة دي بقت ملهاش لزمة ❎
الحل التالت : صورة بجودة منخفضة
إنك تبعت اللوجو للعميل كصورة جودتها رديئة ومبكسلة شوية ، ده كان حل زمان قبل عصر الذكاء الإصطناعي! لكن حالياً في مواقع مجانية تقدر تكبرلك الصورة لحد ٨ أضعاف حجمها 😳 يعني فكرة إنك تبعت اللوجو كصورة جودتها ضعيفة دي فكرة وحشة ❎
الحل الرابع : صور شاشة الجهاز بالموبايل + واشتغل بعد ما تاخد عربون
بعد ما تبعنا من الحلول اللي عفى عليها الزمن وأصبحت بلا فائدة، وصلنا إلى الحل الواقعي والمنطقي حالياً وهو إنك تشتغل بعد ما تاخد عربون ، ولما تعرض اللوجو على العميل صور الشاشة بموبايلك وابعتله. وبكده مش هيقدر ينصب عليك ويسرق شغلك. وحتى لو سرق الفكرة بتاعة اللوجو ع الأقل هتكون أخدت جزء من فلوسك وهو العربون.
لو عندك حل أفضل ، ابعتهولنا على صفحة أبانوب حنا ع الفيسبوك.
إن كنت تفضل مشاهدة الفيديو أكثر من قراءة المقالات، اشترك في القناة على اليوتيوب من هنا. إن كنت تستخدم برنامج تليجرام ، يُمكنك الاشتراك في قناة تيليجرام للحصول على الموضوعات الجديدة. لمزيد من المعلومات عن البرمجة ولينكس وأندرويد وويندوز وماك وآيفون وتصميم المواقع، ابحث عن "موقع أبانوب حنا للبرمجيات" على جوجل وادخل للموقع وستجد موضوع جديد يشرح فكرة أو معلومة جميلة ومفيدة كل يوم.
0 comments:
إرسال تعليق